Тошкентда 100 дан ортиқ экологик меъёрларни бузган хўжалик фаолияти тўхтатилди

 

Тошкент шаҳри ҳамда Тошкент вилоятида экологик хавфсизлик талабларига риоя этмаган 106 та хўжалик юритувчи субъектнинг фаолияти вақтинча тўхтатилди. Шунингдек, дудбуронлардан фойдаланиш қоидаларини бузган 58 та иссиқхона хўжалигига нисбатан маъмурий жарима қўлланилди.

 

Бу чора-тадбирлар Ўзбекистон Республикаси Вазирлар Маҳкамасининг 2025 йил 8 февралдаги 59-Ф-сон фармойиши ижроси доирасида амалга оширилмоқда. Фармойишда пойтахт ва вилоят ҳудудларида атмосфера ҳавосини муҳофаза қилиш, чиқиндиларни камайтириш ҳамда зарарли газ ва тутун чиқишини назорат қилиш бўйича аниқ вазифалар белгиланган.

 

Экология, атроф-муҳитни муҳофаза қилиш ва иқлим ўзгариши вазирлиги, Бош прокуратура ҳамда Тошкент шаҳри ва вилояти ҳокимликлари томонидан 300 дан ортиқ мутахассислардан иборат ишчи гуруҳлар тузилди. Улар томонидан 4 869 та объект ўрганилиб, шундан 595 таси иссиқхона хўжаликлари, 2 265 таси ижтимоий соҳа объектлари, 1 998 таси эса саноат ва қурилиш корхоналарини ташкил этди.

 

Текширувлар натижасида айрим хўжаликларда зарарли кимёвий, физик ва биологик моддаларнинг ҳавога чиқарилиши, шунингдек, экологик меъёрларга зид фаолият юритиш ҳолатлари аниқланди. Ҳар бир қонунбузилиш бўйича тегишли чоралар кўрилди: 106 хўжалик фаолияти вақтинча тўхтатилди, 58 иссиқхона жаримага тортилди, 387 ҳолат бўйича расмий огоҳлантириш хатлари юборилди.

 

Экологик назорат тадбирлари мунтазам давом эттирилмоқда. Мазкур ишлар пойтахт ва вилоятларда ҳавонинг сифатини яхшилаш, аҳоли саломатлигини муҳофаза қилиш ҳамда барқарор экологик муҳитни таъминлашга қаратилган.