Ҳисоб палатаси “Давлат аудити” дастуридан фойдаланиш тартибини белгилади
Янги тартиб давлат молиявий назоратини рақамлаштиришни жадаллаштириши кутилмоқда.
Адлия вазирлиги “Давлат молиявий назорат органлари ва ички аудит хизматлари томонидан 'Давлат аудитиʼ дастурий комплексидан фойдаланиш тартиби тўғрисида”ги низомни рўйхатдан ўтказди. Ҳужжатга кўра, эндиликда барча назорат тадбирлари ягона электрон тизим орқали рўйхатга олинади ва Ҳисоб палатаси билан мажбурий равишда келишилади.
Янги тартиб тизимдан фойдаланадиган субъектлар учун аниқ ваколатларни белгилайди. Раҳбар ва уларнинг ўринбосарлари «тасдиқловчи», таркибий бўлим бошлиқлари «маъқулловчи», ички аудит ходимлари эса «оператор» сифатида тизимга кириш ҳуқуқига эга бўлади. Оператор бўлмаган бошқа ходимларга эса «фойдаланувчи» мақоми берилади.
Эндиликда давлат органлари ва ташкилотлар “Давлат аудити” тизимида рўйхатдан ўтиш учун Ҳисоб палатасига махсус сўровнома юборади. Энг муҳими, тизимда қайд этилмаган ҳар қандай назорат ёки аудит тадбири энди ноқонуний деб ҳисобланади. Бу эса текширувларнинг ошкоралиги ва тартибга солинганлигини янада кучайтиради.
