Ўзбекистонда 25,5 мингдан ортиқ кўзи ожиз ва заиф кўрувчи шахслар рўйхатга олинди
Кўриш имконияти чекланганлар бўйича янгиланган статистика тақдим этилди.
Ижтимоий ҳимоя қилиш миллий агентлиги маълумотларига кўра, 2025 йил 1 ноябрь ҳолатига мамлакатда 25,5 мингдан ортиқ кўришда нуқсони бўлган шахслар истиқомат қилмоқда.
Агентлик ушбу тоифа фуқароларнинг мустақил ҳаёт кечиришини қўллаб-қувватлаш, таълим ва бандлик имкониятларини кенгайтириш, жамиятга тўлақонли интеграциялашувини таъминлаш бўйича тизимли ишларни олиб бормоқда.
Ҳозирга қадар 340 та ижтимоий, коммунал ва тижорат объектида тўсиқсиз муҳит яратилди, тактил қопламалар ўрнатилди. Шунингдек, 18 та йирик чорраҳа ва 753 та светофор овозли сигнализация билан жиҳозланди.
Мамлакатдаги 17 та махсус мактабда уч мингдан ортиқ кўзи ожиз ёки заиф кўрувчи ўқувчи таълим олмоқда.
2025 йилнинг 10 ойи давомида 7 756 нафар фуқарога реабилитация хизматлари кўрсатилиб, кўз протезлари, Брайл алифбоси ва ёзувлари, тонометрик, ҳарорат ўлчовчи овозли қурилмалар ҳамда овозли глюкометрлар билан таъминлаш ишлари амалга оширилди.
Бундан ташқари, 13 минг 400 нафар кўришда нуқсони бўлган фуқаро шахмат, шашка, гоалбол, 5х5 футбол каби турли спорт йўналишлари билан шуғулланмоқда.
