ЮНEСКО Ўзбекистонга миннатдорлик билдирди
Самарқанддаги конференция Ўзбекистоннинг ташкилий салоҳиятини эътироф этди.
Самарқанд шаҳрида 2025 йил 30 октябрь – 13 ноябрь кунлари бўлиб ўтган ЮНEСКО Бош конференциясининг 43-сессияси доирасида делегациялар Ўзбекистон халқига ва ҳукуматига чуқур миннатдорлик билдирди.
Улар самимий меҳмондўстлик, илиқ қабул ва конференция ишини муваффақиятли ташкил этиш учун яратилган шароитларни юқори баҳолади. Сессиянинг гўзал Самарқанд шаҳрида ўтказилгани ва Ўзбекистон ҳукуматининг барча аъзо давлатлар, уюшган аъзолар ва кузатувчиларнинг тўлиқ иштирокини таъминлаш бўйича саъй-ҳаракатлари алоҳида эътироф этилди. Делегациялар Президент Шавкат Мирзиёевнинг конференцияга кўрсатган эътибори ва шахсан иштирокини ҳам қадрлади.
Шунингдек, Ўзбекистон ташкилотлари ва ходимларининг юқори касбий маҳорати конференция ишининг уйғун ва самарали ўтишига катта ҳисса қўшгани қайд этилди. Делегациялар Ўзбекистоннинг бой маданий мероси орқали халқаро ҳамкорлик ва ўзаро тушунишни мустаҳкамлашдаги ҳиссасини алоҳида таъкидлади.
