Нукусда салкам 6 минг литр алкоголь маҳсулотлари йўқ қилинди
Маълум бўлишича, улар қўлбола усулда ишланган ва ҳеч қандай стандарт талабларга жавоб бермайди.
Сўнгги вақтларда алкоголь маҳсулотларини истеъмол қилиб, саломатли зарар етказган ёки шундай маҳсулотлар сабаб вафот этган шахслар ҳақидаги хабарлар кўп тарқалмоқда.
Шунга қарамасдан, инсоннинг кучли заҳарланишига ҳаттоки ўлимига сабаб бўлиши мумкин бўлган қўлбола ишланган, ҳеч бир стандарт талабларига жавоб бермайдиган спиртли ичимликларни истеъмолчиларга етказиб бериш ва уларни алдаб сотиш ҳолатлари минг афсуски учраб турибди.
Хусусан, Мажбурий ижро бюроси Нукус шаҳар бўлими иш юритувида мавжуд бўлган, Жиноят ишлари бўйича судларнинг қарорларига асосан Бош прокуратура ҳузуридаги Иқтисодий жиноятларга қарши курашиш департаменти томонидан олиб қўйилган 5 888 литр алкоголь маҳсулотлари ва 2 193 литр этил спиртини йўқ қилиш белгиланган.
Ушбу суд қарорлари ижросини таъминлаш мақсадида Бюронинг Қорақалпоғистон Республикаси бошқармаси ва Нукус шаҳар бўлими ходимлари томонидан олиб борилган ижро ҳаракатлари натижасида йўқ қилиниши белгиланган маҳсулотлар тегишли идоралар ходимлари иштирокида жорий йилнинг 12 ноябрь куни йўқ қилиниб, суд қарорлари ижроси амалда таъминланди.
