Тошкент ҳавоси яна хавфли даражага етди
PM10 заррачалари миқдори меъёрдан 1,2 баравар юқори экани маълум бўлган.
Тошкентда атмосфера ҳавоси сифатини кузатиш станциялари 16 ноябрь куни кечқурун жуда хавотирли кўрсаткичларни қайд этди. PM10 заррачалари миқдори меъёрдан 1,2 баравар, энг хавфли ҳисобланган PM2.5 эса қарийб 3,5 баравар юқори экани маълум бўлди. Бу заррачалар нафас йўллари орқали осон кириб, соғлиқ учун жиддий хавф туғдиради.
UzGidromet мутахассисларининг таъкидлашича, кескин ҳарорат ўзгариши туфайли атмосфера қатламида инверсия жараёни юзага келган — айнан шу ҳолат майда заррачаларнинг ер сатҳига яқин қолиб кетишига ва ҳаво ифлосланишининг ортишига сабаб бўлган. Афсуски, бу вазият республика ҳудудида бир неча кун сақланиб қолиши кутилмоқда.
