АҚШда Ўзбекистон фуқароси терроризмда гумонланиб ҳибсга олинди
У АҚШга 2023 йилда ноқонуний кирган ва юк машинаси ҳайдовчиси сифатида ишлаган.
АҚШ Иммиграция ва божхона назорати хизмати (ИСE) Ўзбекистон фуқароси, 31 ёшли Аҳрор Бозоровни террорчилик фаолиятига алоқадорликда гумонлаб ҳибсга олди. Бу ҳақда “Fox News” хабар берди.
Маълумотларга кўра, Бозоров 2022 йилда Ўзбекистонда террористик ташкилот фаолиятини тарғиб қилиш ва интернет орқали жиҳодга чақириқлар тарқатишда айбланиб, қидирувга берилган. Шунингдек, у фуқароларни экстремистик гуруҳларга қўшилишга ундашда гумон қилинмоқда.
ИСE ходимлари уни 9 ноябрь куни Канзас штатида юк машинаси ҳайдовчиси сифатида ишлаётган пайтда ҳибсга олган. Аниқланишича, Бозоров 2023 йил февраль ойида АҚШ чегарасини ноқонуний кесиб ўтган. Чегара патрули уни қўлга олган бўлсада, кейинчалик қўйиб юборган. Шундан сўнг у АҚШда иш рухсатномаси ва тижорат юк машинаси ҳайдовчилик гувоҳномасини олган.
Расмий маълумотларда унинг ҳайдовчилик ҳужжатларида Филаделфия шаҳрининг Сомертон ҳудудида яшагани қайд этилган.
