Ўзбекистон 2026 йилда ҳам Афғонистонга электр энергияси етказиб беради

 

Энергетика вазирлигига кўра, Ўзбекистон 2026 йилда ҳам Афғонистонга электр энергиясини етклазиб беради. Бу бўйича 17 ноябрь куни Энергетика вазири Жўрабек Мирзамаҳмудов ва Афғонистоннинг «ДАБС» компанияси бош директори Абдул Бори Умар бошчилигидаги учрашувда тегишли шартномалар имзоланди.

 

Учрашувда жорий йилнинг сентябрь ойида Ўзбекистон Республикаси Президенти Шавкат Мирзиёевнинг БМТ Бош Ассамблеяси 80-сессиясида ҳамда Тошкентда бўлиб ўтган Марказий Осиё давлатлари раҳбарларининг еттинчи Маслаҳат учрашувидаги нутқлари қўшни Афғонистон халқи фаровонлиги ва иқтисодиётининг ривожи ҳақидаги ташаббуслари икки давлат ҳамкорлигини янада мустаҳкамлашга хизмат қилаётгани алоҳида таъкидланди.

 

Бу борада Ўзбекистон-Афғонистон ўртасида энергетика соҳасида ҳам йирик лойиҳалар амалга оширилмоқда. Хусусан, Афғонистон ҳудудида қурилаётган юқори кучланишли электр узатиш тармоқлари ва подстанцияларининг жорий ҳолати ҳамда ушбу ишларни янада жадаллаштириш масалалари муҳокама қилинди.

 

Шунингдек, Афғонистон ҳудудида қурилаётган юқори кучланишли электр узатиш тармоқлари ва подстанцияларнинг жорий ҳолати муҳокама қилинди. Томонлар қурилиш ишларини янада жадаллаштириш бўйича келишиб олди.

 

Маълумот учун, Ўзбекистон Афғонистоннинг асосий электр етказиб берувчиси бўлиб қолмоқда. Афғонистонда ички ишлаб чиқариш ҳажми 250 МВт атрофида бўлиб, мамлакат Туркманистон, Эрон, Ўзбекистон ва Тожикистондан йилига 800 МВт гача электр энергиясини импорт қилади. Бунинг учун йилига 250–280 миллион доллар сарфланади. Ўзбекистон 2002 йилдан бери Афғонистонга мунтазам равишда электр энергияси етказиб бермоқда.