Ўзбекистон 2035 йилгача иссиқхона газлари ташламаларини 50 фоизга камайтиришни режалаштирмоқда
БМТ конференциясида Ўзбекистоннинг иқлим ўзгаришига қарши мақсадлари эълон қилинди.
Бразилиянинг Белен шаҳрида БМТнинг Иқлим ўзгариши бўйича халқаро конференцияси (CoP30) доирасида юқори даражадаги сегмент бўлиб ўтди. Тадбирда Ўзбекистон Республикаси экология, атроф-муҳитни муҳофаза қилиш ва иқлим ўзгариши вазири Азиз Абдуҳакимов нутқ сўзлади.
Вазир нутқида Марказий Осиёнинг иқлим ўзгаришига нисбатан юқори даражадаги заифлигини, ерларнинг деградацияси кучайиб бораётганини ва сув ресурсларининг қисқараётганини таъкидлади. Шунингдек, минтақада ҳарорат аллақачон 2,2 °С га кўтарилганини ва музликлар ҳар йили ҳажмининг 0,5 фоизигача йўқотилаётганини айтиб ўтди.
Азиз Абдуҳакимов Ўзбекистон Республикасининг Миллий миқёсда белгиланган ҳиссалар (ММБҲ) бўйича янги мақсадини эълон қилди — 2010 йилга нисбатан 2035 йилгача ЯИМ бирлигига тўғри келадиган иссиқхона газлари ташламаларини 50 фоизга камайтириш.
Шунингдек, вазир қайта тикланувчи энергия, ўрмонзорларни кенгайтириш, чиқиндиларни бошқариш тизимини модернизация қилиш режалари ҳақида сўзлади. “Green University” ташаббуси ва чўлланишга қарши кураш бўйича ташкил этилаётган минтақавий марказнинг аҳамияти ҳам алоҳида таъкидланди.
Якунда Азиз Абдуҳакимов иштирокчиларни 2026 йил 31 май – 5 июнь кунлари Самарқандда ўтказиладиган GEF'нинг 8-Ассамблеяси ва "Eco Expo Central Asia" кўргазмасига таклиф қилди.
