Ўзбекистон куз-қиш мавсумида 10 миллион тонна кўмир қазиб олишга тайёрланмоқда

Давлат раҳбари Шавкат Мирзиёев кўмир қазиб чиқариш бўйича эришилган кўрсаткичлар ва янги режалар тақдимоти билан танишди. Мамлакатда куз-қиш мавсумида аҳоли ва иқтисодиёт тармоқларини энергия ресурслари билан узлуксиз таъминлаш устувор вазифа этиб белгилангани, шу мақсадда кўмир саноатида янги лойиҳалар ишга туширилаётгани маълум қилинди. Ўтган мавсумда 8,7 миллион тонна кўмир қазиб олиниб, аҳолига, бюджет ташкилотлари ҳамда иссиқлик электр станцияларига етказиб берилган.

 

Янги мавсумда эса кўмир ишлаб чиқариш ҳажмини 10 миллион тоннага етказиш кўзда тутилган. Бу борада «Ўзбеккўмир» АЖ корхоналари модернизация қилинмоқда, қўшимча ишлаб чиқарувчилар учун имкониятлар яратилмоқда. Президент аҳолига кўмир етказиб беришни кафолатлаш бўйича аниқ топшириқлар берди, рақобатни кучайтириш ва маҳсулот таннархини пасайтириш муҳимлиги таъкидланди.

 

Шунингдек, тақдимот давомида уран бўйича янги инвестиция лойиҳаларини тезлаштириш, геология-қидирув ишлари кўламини кенгайтириш масалалари ҳам кўриб чиқилди. Давлат раҳбари бундан аввал суюлтирилган газ етказиб беришдаги узилишларни кескин танқид қилиб, масалага зудлик билан ечим топиш кераклигини қайд этган эди — айнан энергия хавфсизлигини таъминлаш бу мавсумда энг устувор вазифалардан бири бўлиб қолмоқда.