Наманганда таълим тизимидаги мансабдорлар томонидан ташкил қилинган "бункер" фош этилди
Аттестация имтиҳонларида ноқонуний ёрдам кўрсатган мансабдорлар ва ўқитувчилар қўлга олинди.
Наманган шаҳрида таълим тизимида фаолият юритувчи бир гуруҳ мансабдор шахслар томонидан ташкил этилган ноқонуний «бункер» фош этилди. ДХХ ва Иқтисодий жиноятларга қарши курашиш департаменти томонидан ўтказилган тезкор тадбир давомида мазкур хонадонда аттестация имтиҳонлари учун тест саволларини масофадан туриб ечишга жалб қилинган 12 нафар ўқитувчи аниқланган.
Текширув жараёнида бир нечта ноутбуклар, 30 дона турли эшитиш мосламалари, яширин камералар, 8 та Wi-Fi router ва бошқа техник воситалар ашёвий далил сифатида олинди.
Маълум бўлишича, Давлатобод туманидаги умумий ўрта таълим мактаби директори ўринбосари, Наманган давлат техника университети бўлим бошлиғи ва бўлим мутахассиси педагогларга моддий манфаат эвазига тест саволларини «бункер» орқали ечишда ёрдам бериб келган. Улар айрим ўқитувчилардан аттестация натижаларини ижобий ҳал қилиб бериш учун 1300–1500 доллар талаб қилган бўлиб, фақатгина сентябрь–октябрь ойларида 25 минг доллар миқдорида пул йиғиб олганликлари аниқланган.
Ҳозирда мазкур шахсларга нисбатан Жиноят кодексининг 168-моддаси 3-қисми «б» банди ва 28,211-моддаси 2-қисми «а» банди билан жиноят иши қўзғатилиб, тергов ҳаракатлари олиб борилмоқда. Аниқланишича, мактаб директори ўринбосари ва «бункер»ни бошқарган шахс аввал ҳам худди шундай жиноят учун жавобгарликка тортилган.
