Шерзод Кудбиев Урбанизация ва уй-жой бозорини барқарор ривожлантириш миллий қўмитаси раиси лавозимига тайинланди
Янги ташкил қилинган қўмитанинг устувор вазифалари белгиланди.
Ўзбекистон Республикаси Урбанизация ва уй-жой бозорини барқарор ривожлантириш миллий қўмитасининг асосий фаолият йўналишлари белгиланди. Янги тузилманинг вазифалари мамлакатда шаҳарсозлик жараёнларини тўғри йўналтириш ва аҳолига қулай яшаш шароитларини яратишга қаратилган.
Қўмита урбанизация жараёнларини мувофиқлаштириш ва ривожлантириш, самарали ҳамда барқарор уй-жой сиёсатини ишлаб чиқиш, реновация дастурларини сифатли бажарилишини таъминлаш каби бир қатор муҳим йўналишларда фаолият олиб боради. Шунингдек, “Янги Ўзбекистон” массивларини қуриш ишларини бошқариш, ҳудудлар танланишида қонунчиликдаги мезонларга амал қилинишини назорат қилиш ҳам асосий вазифалар сирасига киради.
Мазкур ташаббуслар шаҳарларни тартибсиз ривожланишдан асраш, уларни оқилона режалаштириш ва аҳолига қулай бўлган инфратузилма яратишни кўзда тутади. Натижада фуқаролар учун замонавий, хавфсиз ва қулай яшаш муҳити шаклланиши кутилмоқда.
