Эрдоған Путин билан телефонлашди
Лидерлар Украинадаги вазият ва Ақшнинг тинчлик режаси юзасидан фикр алмашди.
Россия президенти Владимир Путин ва Туркия президенти Ражаб Тоййиб Эрдўған 24 ноябрь куни телефон орқали мулоқот қилди. Суҳбат давомида улар Украинадаги вазиятни муҳокама қилиб, АҚШ томонидан тақдим этилган тинчлик режаси масаласини кўриб чиқди.
Путин таклифлар Россия ва АҚШ ўртасида Аляскада бўлиб ўтган музокараларга мос келишини ва келажакдаги тинчлик келишувининг асосини ташкил қилиши мумкинлигини таъкидлади. Шу билан бирга, у Москванинг Украинадаги инқирозни сиёсий ва дипломатик йўл билан ҳал қилишдан манфаатдорлигини қайд этди.
Эрдўған эса музокараларни қўллаб-қувватлашга тайёрлигини билдириб, бу жараёнда Истамбул платформасини таклиф қилди. Раҳбарлар, шунингдек, Украинага оид масалаларда Россия ва Туркия алоқаларини мустаҳкамлашга келишиб олди.
Суҳбат давомида икки томонлама ҳамкорлик масалалари ҳам муҳокама қилинди: савдо ва сармоя алоқаларини кенгайтириш, шунингдек, энергетика соҳасидаги стратегик лойиҳаларни ривожлантириш масалаларига алоҳида эътибор қаратилди. Аввалроқ Эрдўған Г20 саммити якунида яқин кунларда Путин билан суҳбатлашишини маълум қилган, хусусан, “ғалла йўлаги”ни тиклаш масаласини муҳокама қилишни режалаштирганди.
Бундан ташқари, Туркия раҳбари 19 ноябрда Украина президенти Владимир Зеленский билан учрашувдан сўнг, Истанбулда тўғридан-тўғри музокараларни тиклашни қўллаб-қувватлашини билдирган. Шу билан бирга, аввалроқ Россия Давлат Думаси Мудофаа қўмитаси ўринбосари Алексей Журавлёв АҚШнинг таклифини Россия учун мақбул эмас деб атаб, уни урушни якунламайдиган «провокация» сифатида баҳолаган.
