“Кўп гапирмасдан амалий жасорат кўрсатинг” — Шоҳрух Шодмонов ҳаво ифлосланаётганига муносабат билдирди
У масъулларни ҳисобот ва изоҳлар билан чекланмасдан, реал ҳаракатлар бошлашга чақирмоқда.
Тошкент шаҳри Чилонзор тумани кенгаши депутати, хонанда Шоҳрух Шодмонов масъулларни ҳаво ифлосланишига қарши реал ҳаракатлар бошлашга чақирди. Бу ҳақида у ўзининг Инстаграм саҳифасида пост ёзиб қолдирди.
“Бу мавсумийлик ёки табиий жараёнлар эмас, бу — бефарқлик натижасидир. Болаларимиз заҳарли ҳаводан нафас олмоқда. Одамлар ниқоб ва тозалагичлар билан ўз соғлиғини ҳимоя қилишга уринмоқда. Бироқ, ҳамманинг ҳам бундай нарсаларни сотиб олишга имкони йўқ. Аҳоли қўлидан келганини қилмоқда, лекин масъул тузилмалар ҳануз фақат ҳисобот ва изоҳлар билан чекланмоқда”, — дея қайд этди депутат.
Унинг таъкидлашича, экология масъуллари бу масалани тез, қатъий ва кескин тарзда ҳал қилиши керак.
«Сизларнинг сусткашлигингиздан миллионлаб тирик одамлар азият чекяпти. Шу кунларда сизларга кенгайтирилган ваколатлар ва реал воситалар берилди. Бу сизлар учун қаҳрамонларга айланиш имконияти!
“Агар шундан кейин ҳам ҳеч нима қила олмасангиз, унда билмадим сизларни нима деб аташни. Шунинг учун кўп гапирмасдан амалий жасорат кўрсатинг!” — деб постини якунлаган Шоҳрух Шодмонов.
