Навоийда 3 ёшли қизнинг қўли гўшт майдалагичга кириб кетди

Навоий вилоятининг Зарафшон шаҳридаги хонадонлардан бирида 3 ёшли қизалоқнинг қўли гўшт майдалагичга кириб кетди. Бу ҳақида ўз манбаларига таяниб, Kun.uz нашри хабар бермоқда. 

 

Қайд этилишича, қизча овқат учун гўшт тайёрлаётган онасининг ёнида турган ва кутилмаганда қўлини майдалагичнинг юқори қисмидаги бўшлиқдан тушириб юборган. Она дарҳол қурилмани тўхтатган, аммо бармоқлар металл конструкция ичида сиқилиб қолган. Жиҳоз металлдан ишлангани ҳисобига уни синдириш имкони бўлмаган.

 

Шундан сўнг, аёл шаҳар тез тиббий ёрдам бўлимига мурожаат қилган. Тез тиббий ёрдам ходимлари 12 дақиқа ичида воқеа жойига етиб борган. Болани ҳаракатлантириш жараёнида жароҳат янада чуқурлашиб кетмаслиги учун 3 нафар тиббиёт ходими қизалоқни гўшт қиймалагич билан бирга шифохонага кўтариб келишган.

 

Зарафшон шаҳар тиббиёт бирлашмаси травматолог-шифокори Элмурод Аҳатовнинг маълум қилишича, бола шифохонага олиб келинганда ҳуши бор, аммо оғриқ шоки остида эди. Чап қўлида кўп миқдорда қон кетиши, юмшоқ тўқиманинг чуқур шикастланишлари кузатилган. Жароҳат асосан чап қўл бармоқлари ва кафт қисмида юзага келган.

 

“Операция 2 соатдан ортиқ давом этди. Жараён жуда мураккаб бўлди, бармоқ пайлари, нерв толалари, мушакларнинг бир қисми жароҳатланганди. Операцияда микрожарроҳлик тикувлари, махсус оптик ускуналар, қон томирларини тиклаш учун нозик жарроҳлик ипларидан фойдаланилди. Энг қийин қисм бармоқлардаги қон томирларни тиклаш бўлди. Чунки бундай ёшдаги болаларда томирлар жуда нозик, уларни тиклаш учун катта тажриба ва аниқлик талаб этилади”, – дейди Элмурод Аҳатов.

 

Шифокорнинг айтишича, даставвал қўлни сақлаб қолиш имконияти 50 фоиздан паст баҳоланган. Жароҳат чуқур бўлгани, йирик нерв толалари ва қон томирлари шикастлангани сабабли некроз, функцияни йўқотиш хавфи юқори бўлган.

 

Ҳозирда қизалоқнинг аҳволи барқарор, у жарроҳликдан кейинги кузатув палатасида. Тикланиш жараёни камида 2–3 ой, тўлиқ мотор функцияларини тиклаш эса 6 ойгача давом этиши мумкин.