Нукусда ота 110 млн сўм алимент қарзини тўлади
Унинг четга чиқиш ҳуқуқи чеклангач, қарзни тўлашга мажбур бўлган.
Мажбурий ижро бюроси Нукус шаҳар бўлими иш юритувида мавжуд бўлган, Фуқаролик ишлари бўйича Нукус туманлараро судининг 2022 йил 11 март кунги ижро ҳужжатига асосан ундирувчи Х.Г.нинг фойдасига тарбиясидаги бир нафар фарзандининг таъминоти учун, қарздор Ю.А.дан унинг ҳар ойдаги жами даромадининг 1/4 қисми миқдорида алимент ундириш белгиланган.
Қарздор алимент пулларини ўз вақтида тўлаб келмаганлиги оқибатида унинг собиқ турмуш ўртоғи олдидаги қарздорлиги 110 млн сўмдан ошиб кетган.
Шу сабабли, бўлим давлат ижрочиси томонидан қарздорнинг Ўзбекистон Республикасидан чиқиш ҳуқуқига чеклов ўрнатилиб, уни маъмурий жавобгарликга тортиш мақсадида тегишли тартибда ҳужжатлар расмийлаштирилган.
Шунинг натижасида қарздор жорий йилнинг 21 ноябрь куни Бюронинг Нукус шаҳар бўлимига келиб 110 млн. сўм қарздорликни ундирувчининг банк пластик картасига ўтказиб берган.
