Тошкентда 490 грамм "гашиш" яширилган курьер жўнатмаси қўлга олинди
Тезкор тадбир давомида жўнатма ва уни қабул қилувчилар бир вақтнинг ўзида фош этилган.
Тошкент шаҳридаги “Toshkent-AERO” ИБК тезкор ходимлари томонидан гиёҳванд моддаларни яширин тарзда етказишга уриниш фош этилди. Тезкор тадбир давомида 490 грамм оғирликдаги «гашиш» сақланган курьер жўнатмаси аниқланиб, уни қабул қилаётган шахс қўлга олинди.
Миробод туманида ўтказилган тадбир чоғида, ҳужжатларга кўра қутида косметика воситалари ва ширинликлар бўлиши керак эди. Аммо текширув натижасида ушбу қоғоз қути ичидан 490 грамм «гашиш» гиёҳвандлик моддаси топилди. Жўнатмани олиб, почта бўлимидан чиқаётган фуқаро тезкор ходимлар томонидан тўхтатилди.
Тадбир давом эттирилиб, ушбу жўнатмани олиши керак бўлган иккинчи фуқаро ҳам қўлга олинди. Унинг яшаш хонадонига ўтказилган текширув вақтида гиёҳванд моддаларни "закладка" усулида яширишга мўлжалланган магнит тошлар, электрон тарозилар, изолентлар ва бошқа воситалар топилди.
Ҳозирда ҳолат юзасидан божхона органлари томонидан суриштирув ишлари олиб борилмоқда.
