Адиз Бобоев Самарқанд вилояти ҳокими этиб тайинланди

Бир йил давомида Самарқанд вилояти ҳокими вазифасини бажариб келган Адиз Бобоев вилоятнинг тўлақонли ҳокими этиб тасдиқланди. Қарор бугун, 25 ноябрь куни Ургут туманида Президент Шавкат Мирзиёев иштирокида ўтказилган Халқ депутатлари Самарканд вилояти Кенгашининг навбатдан ташқари сессиясида қабул қилинди.

 

Давлат раҳбари ўз нутқида мамлакатда инсон қадри, барқарор иқтисодий ўсиш ва аҳолининг фаровонлигини ошириш борасидаги кенг кўламли вазифалар давом этаётганини қайд этди. Шу мақсадлар йўлида вилоятга “замонавий фикрлайдиган, муаммоларни тизимли таҳлил қилиб, инновацион ечим бера оладиган раҳбар” кераклиги таъкидланди. Президент айнан шундай сифатлар сабаб Адиз Бобоев номзодини тавсия этганини билдирди.

 

Сессияда вилоят фаоллари томонидан номзод ҳақида фикрлар тингланди ва масала овозга қўйилди. Депутатлар овоз бериб, Бобоевни вилоят ҳокими лавозимига тасдиқлади.

 

Президент янги ҳокимга аниқ вазифалар белгилаб берди — иш ўринлари яратиш, камбағалликни қисқартириш, инвестиция ва экспорт ҳажмини ошириш, таннархни камайтириш ва энергия тежамкорлигини кучайтириш бўйича Самаркандни намунали ҳудудга айлантириш топшириғи қўйилди.

 

Маълумот учун, Адиз Бобоев 1972 йилда туғилган. У Тошкент давлат иқтисодиёт университетини тамомлаган. Меҳнат фаолияти давомида Бухоро вилояти молия бошқармаси, Молия вазирлигининг бир қатор бўлинмаларида масъул лавозимларда ишлаган. 2024 йил 28 ноябрь куни Президент фармонига мувофиқ, у Самарканд вилояти ҳокими вазифасини бажарувчи этиб тайинланганди.