Бувайда тумани “замҳокими” ишини шахсан Бош прокурор назоратга олди
Экоэнспекторга қаршилик қилган ҳоким ўринбосарига нисабатан Жиноят кодексининг бир қанча моддалари билан жиноят иши қўзғатилди.
Фарғонада дарахтларнинг ноқонуний кесилгани ва бу жараёнда туман ҳокими ўринбосари экология инспекторининг қонуний талабларига бўйсинмагани акс этган видеолар ижтимоий тармоқларда тарқалганидан кейин Прокуратура томонидан ҳолат ўрганилди.
Текширувлар давомида, 25 ноябрь куни Бувайда тумани ҳокимининг қурилиш ва экология масалалари бўйича ўринбосари С.Х. мансаб ваколатларидан ҳаққоний фойдаланмасдан, “Найман” маҳалласидаги канал атрофида дарахтлар кесилишининг олдини олаётган Экология қўмитаси инспекторининг қонуний талабларига фаол қаршилик кўрсатгани маълум бўлди. У инспекторни хизмат вазифасини бажаришдан тўхтатиб, ҳодиса жойидан олиб кетгани қайд этилган.
Келтирилган ҳаракатлар давлат ва жамоат манфаатларига сезиларли зарар етказгани сабаб, С.Х. ва бошқа иштирокчиларга нисбатан Жиноят кодексининг 206-моддаси (мансаб ваколатини суиистеъмол қилиш), 219-моддаси (ҳокимият вакилига қаршилик кўрсатиш) ва 198-моддаси (ўсимликларга зарар етказиш) бўйича жиноят иши қўзғатилди.
Жиноят иши юзасидан тергов ҳаракатлари бошланган бўлиб, жараён шахсан Бош прокурор назоратига олинган.
