Бувайдада ҳоким ўринбосари экоинспекторни калтаклади
У дарахт кесилишига қаршилик қилган ходимга тан жароҳати етказгани айтилмоқда.
Аввалроқ ижтимоий тармоқда Фарғона вилояти Экология ва иқлим ўзгариши бошқармаси Экологик назорат инспекцияси ходими Бувайда тумани ҳокими ўринбосари томонидан калтаклангани айтилган видео тарқалганди.
Видеода туман ҳокими ўринбосари дейилаётган Саиджон Хизиров дарахт кесилишини тўхтатишга уринаётган Экоинспектор ишига қаршилик қилиб, аввал уни калтаклагани ва ҳуқуқни муҳофаза қилувчи идоралар ходимлари билан бирга уни ҳудуддан судраб олиб чиқиб кетаётгани акс этади.
Ҳолат юзасидан Фарғона вилояти Экология бошқармаси расмий муносабат билдирди.
Қайд этилишича, рейд давомида Найман МФЙ ҳудудидаги зовур муҳофаза майдонида ноқонуний дарахт кесиш ҳолати аниқланиб, Маслахат МФЙ Чиркай қишлоғида яшовчи S.Z. томонидан жами 26 туп кам қимматли дарахт қонунга хилоф равишда кесилгани маълум бўлган.
Фуқаро S.Z.ga нисбатан Маъмурий жавобгарлик тўғрисидаги кодекснинг 79-моддаси 1-қисми бўйича маъмурий баённома расмийлаштирилиб, 10 300 000 сўм жарима ва 45 891 600 сўмлик ўсимлик дунёсига етказилган зарар ҳисобланган.
Ҳозирда ҳудудда кундалик экологик назорат ўрнатилган ва қўшимча ўрганиш ишлари давом эттирилмоқда.
