Тошкент аэропортида 95 та “iPhone 17” телефони тўхтатиб қолинди
Фуқаро уларни Дубайдан яширинча олиб кираётганда қўлга тушган.
Тошкент халқаро аэропортида фуқаро 95 дона телефонларни яширинча олиб ўтмоқчи бўлди, дея хабар бермоқда Божхона қўмитаси ахборот хизмати.
Қайд этилишича, Божхона қўмитасини Контрабандага қарши курашиш бошқармаси ҳамда “Тошкент-АЭРО” ИБК тезкор ходимлари томонидан мобил қурилмаларнинг ноқонуний олиб кирилиши йўналишида тезкор тадбир ўтказилган.
Дубайдан учиб келган фуқарога тегишли қўл сумкалар божхона ходимлари томонидан текшириб кўрилганида унинг ичида хорижда ишлаб чиқарилган, ҳеч қандай ҳужжатлари бўлмаган, 8 дона “iPhone 17 Pro”, 87 дона “iPhone 17 Prp Мах”, жами 95 дона телефонлар борлиги аниқланди.
Ҳуқуқбузарлик ашёси сифатида вақтинча сақловга олинган жами 95 дона мобил қурилмаларнинг дастлабки қиймати 1 млрд 913 млн сўмни ташкил қилмоқда.
Ҳозирда ҳолат юзасидан божхона органлари томонидан суриштирув ҳаракатлари олиб борилмоқда.
