Тошкент метросида бегона қизга шилқимлик қилган йигит қамалди
Судда йигит айбига иқрор бўлиб, енгилроқ жазо берилишини сўраган.
Тошкент метрополитенининг “Новза” бекатида бегона қизга шаҳвоний шилқимлик қилган йигит 5 суткага қамалди.
Cуд ҳужжатларига кўра, ҳуқуқбузар А.А. 12 ноябрь куни соат 18:50 ларда Чилонзор тумани “Новза” бекатида З.О.нинг шаъни ва қадр-қимматини таҳқирлаб, унга шаҳвоний шилқимлик қилган.
Суд мажлисида А.А. юқорида кўрсатиб ўтилган ҳолатдаги айбига иқрорлигини, содир этган қилмишидан пушаймонлигини, бундан кейин бу ҳолатлар бошқа такрорланмаслигини билдириб, суддан унга нисбатан жазо тайинлашда енгиллик беришни сўраган.
Суд А.А.нинг ушбу ҳуқуқбузарликларни содир қилганлиги, иш ҳужжатларидаги тушунтириш хатлари, ариза, маъмурий ҳуқуқбузарлик тўғрисидаги баённома, суд мажлиси жараёнида аниқланган ҳолатлар ва иш материалларида мавжуд бўлган далиллар билан тўлиқ тасдиқланган деб ҳисоблаган.
Суд қарори билан А.А. МЖтКнинг 411-моддаси 1-қисмида назарда тутилган маъмурий ҳуқуқбузарликни содир қилган деб топилган ва унга нисбатан 5 сутка маъмурий қамоқ жазоси тайинланди.
