Тошкентда ёғингарчилик миқдори кескин пасайди
2025 йил давомида 170 мм ёмғир ёғди — бу 1917 йилдан кейинги энг паст кўрсаткичлардан бири.
Ўзбекистон Гидрометеорология хизмати томонидан ўтказилган кузатув ва таҳлиллар пойтахтда ёмғир миқдори тарихий минимумлардан бирига яқинлашганини кўрсатмоқда.
Мутахассис Эркин Абдулаҳадовнинг маълум қилишича, 2025 йилнинг охирги олти ойи давомида Тошкентда атиги уч маротаба ёмғир ёғган. Статистик маълумотларга кўра, 1860 йилдан бери Тошкентда йилига ўртача 444 миллиметр ёғингарчилик кузатилади. 1917 йилда энг кам — 147 миллиметр ёмғир қайд этилган эди. Жорий йилги кўрсаткич эса 170 миллиметрни ташкил қилиб, сўнгги 100 йилдаги энг паст намлик даражаларидан бири сифатида қайд этилди.
Иқлим ўзгариши фонида минтақада чўлланиш жараёнлари кучайиб бормоқда. Натижада Тошкент ва унга яқин Қозоғистон ҳудудларида қуруқ ландшафтлар кенгайиб, куз ойларида ҳавода чанг миқдори ортмоқда.
Мутахассислар фикрича, бундай камайган ёғингарчилик нафақат ҳаво сифатига, балки ҳудуднинг сув захираларига ҳам бевосита таъсир кўрсатмоқда.
