Янги Ўзбекистоннинг маърифий сиёсати минтақада янги уфқларни очмоқда — Озодбек Назарбеков
Марказий Осиё давлатлари ўртасидаги маданий яқинлашув ҳамкорликни янги босқичга олиб чиқади.
Сўнгги йилларда Янги Ўзбекистон ташаббуслари туфайли Марказий Осиё минтақаси сиёсий харитада бутунлай янгича қиёфа касб этди. Давлат раҳбарларининг учрашувлари, хусусан, еттинчи Маслаҳат учрашуви жараёнлари минтақа мамлакатлари энди рақобатчи эмас, балки ишончли ҳамкор экани яна бир бор кўрсатди. Президент Шавкат Мирзиёевнинг оқилона сиёсати сабаб Марказий Осиёда ўзаро ҳурмат, очиқлик ва бағрикенглик тамойиллари мустаҳкамланиб бормоқда.
Ушбу жараёнда маданият, санъат ва адабиёт алоқалари муҳим омил бўлиб хизмат қилмоқда. Сўнгги йилларда давлат раҳбарларининг ташрифлари доирасида санъаткорлар чиқишлари, маданий алмашинув тадбирлари, биргаликдаги фестиваллар мунтазам йўлга қўйилди. Президент Мирзиёевнинг қўшни мамлакат раҳбарларига китоб совға қилиш анъанаси ҳам халқлар ўртасидаги яқинликни мустаҳкамлашга хизмат қилмоқда. НАВОИЙ, ЖОМИЙ, ФУЗУЛИЙ, МАХТУМҚУЛИ, АБАЙ ва АЙТАМАТОВ каби буюк алломалар умумий маданий мерос сифатида эъзозланаётгани минтақа халқларининг тарихи ва руҳияти бир эканини яна бир бор тасдиқлайди.
Маслаҳат учрашуви давомида Марказий Осиёнинг хавфсизлик ва барқарорлик концепцияси, хавф-хатарлар каталоги ҳамда 2026–2028 йилларга мўлжалланган ҳамкорлик режалари қабул қилинди. Шунингдек, санъат, маданият ва таълим соҳаларида ҳамкорликни кенгайтириш, ёш ижодкорлар алмашинуви дастурлари, рақамлаштириш ва меросни тиклаш лойиҳаларини кучайтириш бўйича келишувларга эришилди. “Марказий Осиё маданий бренди”ни яратиш ташаббуси ҳам қўллаб-қувватланди.
Президент Мирзиёев илгари сурган яна бир муҳим ғоя — минтақанинг умумий қадриятларига таянган “Оқсоқоллар кенгаши”ни тузиш таклифи бўлди. Учрашувлар жараёнида “Марказий Осиё ҳамжамияти” стратегик форматини шакллантириш бўйича фикрлар билдирилди. Бугун Марказий Осиё иқтисодий, сиёсий ва маънавий жиҳатдан бирлашиб бораётган ягона макон сифатида эътироф этилмоқда. Янги Ўзбекистоннинг маърифий сиёсати эса нафақат мамлакат, балки бутун минтақанинг келажак тараққиёти учун янги уфқлар очмоқда.
Озодбек Назарбеков,
Маданият вазири
