Ўзбекистонда дронлар ёрдамида экологик мониторинг тизими жорий қилинди
Кадастр агентлиги, Екология қўмитаси ва Космик тадқиқотлар агентлиги ҳамкорлигида чанг, қурилиш материаллари сақлаш қоидалари ва санитария талабларига риоя қилиниши доимий равишда назорат қилинади.
Ўзбекистон Республикаси президенти қарори асосида атмосфера ҳавоси сифати ва атроф-муҳитни муҳофаза қилиш бўйича янги чора-тадбирлар бошланди. Эндиликда дронлар ёрдамида Тошкент шаҳридаги қурилиш объектлари ва уларнинг атрофидаги ҳудудларда экологик меъёрларга риоя қилинишини мониторинг қилиш тизими йўлга қўйилди.
Кадастр агентлигига учувчисиз учиш аппаратлари орқали чанг чиқариш, қурилиш материалларини нотўғри сақлаш ва санитария қоидаларига риоя қилинмаслик ҳолатларини аниқлаш вазифаси юклатилди.
Шунингдек, Атроф-муҳит қўмитаси маҳаллий ва халқаро илмий-тадқиқот институтлари билан ҳамкорликда мамлакатнинг энг ифлосланган ҳудудларини ўрганиш ва илмий асосланган ечимларни ишлаб чиқиш бўйича давлат буюртмаларини амалга оширади. Космик тадқиқотлар ва технологиялар агентлиги эса табиий ва антропоген манбаларни аниқлаш ҳамда атмосфера ҳавоси сифатини доимий мониторинг қилишни таъминлайди.
Дронлар ёрдамида Тошкент ва унга туташ ҳудудларда қурилиш майдонларида экологик талаблар назорат қилинади. Бундан ташқари, шамол тезлигини ошириш бўйича конвекция усуллари, вентури эффекти ва конвергент усули каби илмий-инновацион тадқиқот лойиҳалари ҳам давлат буюртмаси асосида амалга оширилади.
Бу чора-тадбирлар мамлакатда ҳаво сифати ва атроф-муҳитни муҳофаза қилиш мониторингини кучайтиришга хизмат қилади.
