Тошкентда маст фуқаро кўчада жанжал чиқарди
Жамоат тартибини бузган шахс қўлга олиниб туман судига юборилган.
Жорий йилнинг 25 ноябрь куни соат 23:06 да Миробод тумани, Чимкент кўчасида жойлашган ошхона ходимлари томонидан Ички ишлар вазирлиги томонидан ўрнатилган “ташвиш тугмаси” орқали Миробод тумани Қўриқлаш бўлимига маст ҳолда жанжал қилаётган фуқаро ҳақида хабар келиб тушди.
Соат 23:10 да тунги хизматга жалб қилинган туман Қўриқлаш бўлими тезкор ҳаракатланувчи гуруҳи воқеа жойига етиб келганда, 1991 йилда туғилган A.A. ошхона олдида маст ҳолатда жамоат жойида юриш-туриш қоидаларини менсимасдан, фуқаролар тинчлигини ва жамоат тартибини бузаётганлиги аниқланган.
Фуқаронинг ҳуқуқбузарлигини бартараф этиш жараёнида, у Қўриқлаш бўлими ходимларининг қонуний талабини бажармаган ва кескин қаршилик кўрсатган. Шу сабабли унга нисбатан қонунда белгиланган тартибда жисмоний куч ишлатилиб, зарарсизлантирилган ва туман ИИО ФМБга топширилган.
Ҳозирда Миробод тумани ИИО ФМБ томонидан A.A.га нисбатан Ўзбекистон Республикаси Маъмурий жавобгарлик тўғрисидаги кодекснинг 183-моддаси (“Майда безорилик”) ва 194-моддаси (“Ички ишлар органлари ходимининг қонуний талабларини бажармаслик”) бўйича ҳужжатлар расмийлаштирилиб, ҳаракатларига ҳуқуқий баҳо бериш мақсадида туман судига юборилган.
