25 йилдан ортиқ халқаро қидирувда бўлган террористик ташкилот аъзоси Ўзбекистонга қайтарилди
У Афғонистон, Покистон ва Сурия давлатлари ҳудудида фаолият юритган турли халқаро террористик тузилмалар сафида жанговар ҳаракатларда иштирок этган.
Ўзбекистон Республикаси Давлат хавфсизлик хизмати томонидан хорижий махсус хизматлар билан ҳамкорликда амалга оширилган кенг қамровли тезкор-қидирув тадбирлари натижасида, халқаро террористик ташкилотларга алоқадорлиги сабабли 25 йилдан ортиқ вақт давомида қидирувда бўлган Ўзбекистон фуқароси жорий йилнинг ноябрь ойида хорижда қўлга олиниб, мамлакатга олиб келинди.
Мазкур шахс диний-экстремистик оқим ғояларини қўллаб-қувватлаган,“ҳижрат” ва “жиҳод”ни мақсад қилиб, 1999 йилда Ўзбекистонни тарк этган. У Афғонистон, Покистон ва Сурия давлатлари ҳудудида фаолият юритган турли халқаро террористик тузилмалар сафида жанговар ҳаракатларда иштирок этган.
Узоқ йиллар давомида бошқа шахс номига расмийлаштирилган сохта ҳужжатлар асосида яшириниб юрган бу фуқаро МДҲга аъзо давлатлардан бирида аниқланиб, қўлга олинди.
Ҳозирда унга нисбатан Жиноят кодексининг 154-моддаси (ёлланиш), 155-моддаси (терроризм), 159-моддаси (Ўзбекистон Республикасининг конституциявий тузумига тажовуз қилиш) ва бошқа тегишли моддалар бўйича қўзғатилган жиноят иши доирасида тергов ҳаракатлари олиб борилмоқда.
