Афғонистондан Тожикистонга қуролли ҳужум уюштирилди
Ҳужум оқибатида хитойликлар ҳалок бўлган.
26 ноябрга ўтар кечаси Афғонистон ҳудудидан Тожикистоннинг Хатлон вилоятидаги "Йўл" чегара отрядига қарашли "Истиқлол" 1-чегара пости ҳудудидаги “Шохин СМ” корхонаси ходимлари базасига қуролли ҳужум уюштирилди.
Ҳуқуқни муҳофаза қилувчи манбалар маълумотларига кўра, ҳужум ўқотар қуроллар ва гранаталар билан жиҳозланган дрон ёрдамида амалга оширилган. Оқибатда хитойлик бир неча шахс ҳалок бўлди.
Тожикистон Ташқи ишлар вазирлиги бу жиноий ҳаракатларни қатъиян қоралади ва Афғонистондаги «Толибон» муваққат ҳукуматини икки қўшни давлат чегарасида барқарорлик ва хавфсизликни таъминлаш бўйича чоралар кўришга чақирди.
Мазкур ҳодиса минтақада хавфсизлик масалаларининг ҳануз долзарб эканини кўрсатмоқда ва чегаравий ҳудудларда қўшимча хавфсизлик чораларини кучайтириш зарурлигини эслатади.
