Тошкент шаҳрида қурилиш объектларида экологик назорат кучайтирилди: 70 нафар қурувчи жавобгарликка тортилди
Назоратлар давомида сув пурковчи ускуналар, ювиш майдончалари ва кўкаламзорлаштириш ишлари текширилди.
Тошкент шаҳрида махсус ишчи гуруҳлар томонидан кучайтирилган назорат тадбирлари давомида қурилиш объектларида 3.01.02-23-сонли “Қурилишда хавфсизлик техникаси” шаҳарсозлик нормалари ва қоидаларига риоя этилиши текширилди.
Мазкур тадбирлар экологик вазиятни яхшилаш, қурилиш жараёнида санитария-гигиена талабларига қатъий амал қилинишини таъминлашга қаратилган. Текширувлар давомида ҳар бир объектнинг амалдаги ҳолати ўрганилиб, қуйидаги жиҳатлар назорат қилинди:
- қурилиш майдонида чанг кўтарилишини камайтириш учун сув пурковчи ускуналар ўрнатилиши ва доимий ишлатилиши;
- объектга кириш-чиқиш йўлакларида ювиш воситалари ва дезинфекция майдончалари мавжудлиги;
- юк ва енгил автотранспорт воситаларининг тозаланган ҳолда ҳудуддан чиқиши;
- ер майдонларида чангланиш хавфини камайтирувчи профилактик тадбирлар.
Ўрганиш жараёнида, 60 та қурилиш объектида ҳавога кўтарилаётган чанг ва қум заррачаларини бартараф этиш бўйича талаблар бузилгани, 47 та объект майдонининг 25 фоизи кўкаламзорлаштирилмаганлиги аниқланган.
Мазкур қоидабузарликларни бартараф этиш юзасидан:
- 35 та ёзма кўрсатма берилди;
- 24 объектда сув пуркагич ускуналари ўрнатилди;
- 47 объектда автотранспорт воситаларини ювиш ҳовузлари барпо этилди;
- 68 нафар шахс огоҳлантирилди;
- 70 нафар қурувчи ташкилот вакиллари маъмурий жавобгарликка тортилди.
Ушбу ишлар экологик барқарорликни таъминлаш, шаҳар аҳолиси учун соғлом муҳит яратиш ва қурилиш жараёнларида масъулиятни ошириш мақсадида амалга оширилмоқда. Назорат тадбирлари қатъий давом этади.
