Аёлга зўравонлик қилгани учун Фурқат тумани ИИБ собиқ раҳбарлари 4 йилга қамалди

Жиноят ишлари бўйича Қува туман суди Фурқат тумани ИИБнинг собиқ бошлиғи Акмал Хўжаев ва унинг биринчи ўринбосари Жасур Расуловга нисбатан ҳукмни эълон қилди. Суд уларни бир қатор моддалар бўйича айбли деб топиб, ҳар бирига 4 йилдан озодликдан маҳрум этиш жазосини тайинлади. Шунингдек, улар 3 йил давомида ички ишлар тизими ва давлат иштирокидаги ташкилотларда масъул лавозимларда ишлаш ҳуқуқидан маҳрум қилинди.

 

Айбловга кўра, Хўжаев ва Расулов шахс шаънига тажовуз қилиш, турар жой дахлсизлигини бузиш, ваколатдан ошиш ва қонунга хилоф равишда ушлаб туриш каби жиноятларни содир этганликда айбланди. Суд жазо манзил-колонияда ўтилишини белгилади.

 

Жабрланувчилар — Фурқат туманидаги мактаб директори Гулираъно Қосимова ва солиқ идораси раҳбари Қурбонали Абдураҳмоновга маънавий ва бошқа турдаги зарарларни қоплаш юзасидан фуқаролик судига мурожаат қилиш ҳуқуқи тушунтирилди. Шунингдек, ишда иштироки бўлиши мумкин бўлган бошқа шахсларга нисбатан жиноят иши қўзғатиш масаласини кўриб чиқиш учун материаллар прокуратурага юборилади.

 

Мазкур иш жамоатчилик эътиборида бўлиб, Қосимова суд жараёнининг холис ўтишини сўраб масъулларга мурожаат қилган эди. Сенаторлар ва Ички ишлар вазирлиги вакиллари ҳам воқеа юзасидан муносабат билдириб, қонун устуворлиги ва инсон қадри доимо ҳимоя қилиниши кераклигини таъкидладилар.