Иқтисодий ўсиш ва урбанизация атроф-муҳитга юкламани кучайтирмоқда — Экология қўмитаси раиси

Тошкентда кузатилаётган ҳаво сифатининг пасайиши табиий-иқлимий жараёнлар ҳамда антропоген юкламанинг кескин ортгани билан боғлиқ, дея маълум қилди Экология ва иқлим ўзгариши миллий қўмитаси раиси Азиз Абдуҳакимов. У 26 ноябрь куни ўтказилган брифингда жорий экологик ҳолат ва кўрилаётган чоралар ҳақида маълумот берди.

 

Табиий омиллар орасида энг муҳимларидан бири — ёғингарчиликнинг рекорд даражада камайиб кетгани. 2024 йил октябрда 46 мм ёғин кузатилган бўлса, жорий йилда бу кўрсаткич атиги 1 мм бўлди. Шунингдек, шамол тезлигининг йил сайин пасайиб бориши ҳаводаги ифлосланишнинг тўпланишига олиб келмоқда. Абдуҳакимовга кўра, минтақадаги ҳарорат ўн йилликда ўртача 0,29 даража ошмоқда — бу глобал кўрсаткичдан икки баравар юқори.

 

Антропоген омиллар ҳам экологик вазиятга кучли таъсир кўрсатмоқда. Сўнгги йилларда иқтисодий ўсиш ва шаҳарлар кенгайиши натижасида Тошкентда уй-жой қурилиши 7 баробардан кўпроқ ошган, автомобиллар сони эса 2020 йилдан буён 50 фоизга кўпайган. Атмосферага ташламалар ҳажми 2016 йилдаги 345 минг тоннадан 2024 йилда 486 минг тоннага етган.

 

Экологик вазиятни юмшатиш мақсадида 24 ноябрь куни Президент Администрацияси раҳбари Саида Мирзиёева бошчилигида йиғилиш ўтказилиб, шошилинч чоралар белгиланди. Шундан сўнг 300 дан ортиқ мутахассисдан иборат 30 та ишчи гуруҳ тузилди ва уларнинг фаолияти 24/7 режимида йўлга қўйилди. Ўтказилган рейдлар давомида 331 корхона текширилиб, ҳаво ифлосланишига сабаб бўлаётган 35 та объектнинг фаолияти вақтинча тўхтатилди, юзлаб қурилиш ташкилотларига огоҳлантиришлар берилди.

 

Кўрилган чора-тадбирлар натижасида ҳаво сифатида муайян яхшиланиш сезилди. 24 ноябрь куни ифлосланиш даражаси 350–400 мг/м³ бўлган бўлса, бир кун ўтиб 150–200 мг/м³ гача пасайди. Бироқ Абдуҳакимовга кўра, табиий шароит туфайли ҳаво сифати кескин яхшиланиши дарҳол содир бўла олмайди. Шунинг учун антропоген омилларни максимал даражада камайтириш бўйича ишлар давом эттирилмоқда.