Ўзбекистонда 10 ойда 10 мингдан ортиқ шахс оилавий зўравонлик учун жавобгарликка тортилди
Мулкка зарар етказиш, камситиш, қўрқитиш ва баданга енгил шикаст етказиш каби ҳолатлар учун жарима ҳамда 25 суткагача қамоқ жазоси белгиланган.
Ўзбекистонда 2025 йилнинг январь–октябрь ойларида оилавий зўравонликка оид ҳуқуқбузарликлар бўйича 10 мингдан ортиқ фуқаро маъмурий жавобгарликка тортилди. Бу ҳақда Олий суд матбуот хизмати хабар берди.
Маълумотга кўра, жорий йилнинг 10 ойида жами 10 300 нафар шахс Маъмурий жавобгарлик тўғрисидаги кодекснинг 59-2-моддаси (оилавий (маиший зўравонлик) билан жавобгарликка тортилган.
Олий суднинг қайд этишича, ушбу модда бўйича жавобгарлик қуйидаги ҳолатлар учун қўлланади:
— мулк, соғлиқ ёки меҳнат қилиш ҳуқуқини амалга оширишга тўсқинлик қилиш;
— мулк ва шахсий буюмларга қасддан зарар етказиш;
— шаъни ва қадр-қимматни камситиш, қўрқитиш;
— яқин қариндошларни бир-биридан ажратиб қўйиш;
— оилавий муҳитга зарар етказувчи бошқа зўравонлик турлари.
Мазкур ҳуқуқбузарликлар учун БҲМнинг 10 бараваридан 20 бараваригача жарима ёки 10 суткагача маъмурий қамоқ жазоси белгиланган.
Шунингдек, турмуш ўртоғига, собиқ турмуш ўртоғига, бирга яшовчи шахсга ёки фарзандга баданга енгил шикаст етказиш, қисқа муддатли соғлиғига путур етказиш ёки меҳнат қобилиятининг енгил даражада йўқотилишига сабаб бўлиш ҳолатлари учун 15 суткадан 25 суткагача маъмурий қамоқ қўлланиши мумкин.
Олий суд оилавий зўравонликка қарши курашиш борасида амалдаги қонунчилик талабларини қатъий бажаришга чақирди.
