Ўқитувчилар апелляцияси бекор қилинмади — Вазирлик

 

Ижтимоий тармоқларда тарқалган, гўёки ўқитувчилар учун аттестация натижалари юзасидан апелляция бериш имконияти бекор қилингани ҳақидаги хабарлар жамоатчиликда кескин муносабат уйғотди. Мактабгача таълим ва мактаб таълими вазирлиги мазкур маълумотлар ҳақиқатга мос келмаслигини расман маълум қилди.

 

Вазирликнинг таъкидлашича, 26 ноябрь куни ВМ-740-сон қарори билан жорий этилган ўзгаришлар ўқитувчиларга қўшимча қулайлик яратиш мақсадида қабул қилинган. Эндиликда педагоглар тест синовлари жараёнида — test.uzedu.uz платформаси орқали бевосита онлайн тарзда апелляция аризаси юбориш ёки норозилик билдириш имконига эга бўладилар.

 

Апелляция жараёнини жадаллаштириш мақсадида комиссия малакали мутахассисларни имтиёзли асосда жалб қилиши мумкин. Бу эса зиддиятли ҳолатларни тезкор кўриб чиқиш ва баҳолаш жараёнининг аниқ ҳамда шаффоф бўлишини таъминлайди.

 

Расмий изоҳларга кўра, киритилган ўзгаришлар апелляция бериш ҳуқуқини бекор қилмаган, балки мавжуд тартибни соддалаштирган. Кўриб чиқилган аризалар бўйича комиссия қарори дарҳол аризачининг шахсий кабинетига юборилади.

 

Заруратга кўра, ўқитувчига комиссия қароридан кўчирма тақдим этилиши ёки ҳужжатлар билан бевосита тегишли ташкилотда танишиб чиқиш имконияти яратилади.