“Худо уларни аллақачон жазолаган”- «Замҳоким» ногиронларни ҳақоратлади
Қозоғистонда амалдорнинг ногиронлар ҳақидаги ножўя сўзи жамоатчилик норозилигига сабаб бўлмоқда.
Қозоғистоннинг Олмаота вилояти ҳокимининг биринчи ўринбосари Қанат Есболатовнинг “Худо уларни аллақачон жазолаган” деган ибораси ижтимоий тармоқларда кенг муҳокамага сабаб бўлди. «Нур.кз»нинг ёзишича, ҳодиса Соғлиқни сақлаш вазири билан учрашув чоғида юз берган ва кўплаб фуқаролар бу сўзларни ногиронлиги бор шахсларга нисбатан ҳақорат сифатида қабул қилган.
Ижтимоий тармоқ фойдаланувчилари амалдор баёнотини инсон қадри ва давлат хизматчиси этикасига зид деб баҳолади ҳамда текширув ўтказиш, ҳатто истеъфо масаласини кўриб чиқишни талаб қилишди. Бироқ айримлар Есболатовнинг сўзлари нотўғри тушунилганини, у аслида уларнинг оғир аҳволига ҳамдардлик билдирмоқчи бўлганини таъкидлади.
Мансабдор воқеа юзасидан расмий изоҳ бериб, иборани нотўғри ифодалаганини тан олди. У аслида “Худо уларга катта синов берган” демоқчи бўлганини айтиб, жамоатчиликдан узр сўради. Есболатовнинг қайд этишича, учрашув давомида тартиб бузилгани учун вазият ноқулай тус олган, бироқ кексалар ва ногиронлиги бўлган шахсларга доимо биринчи навбат берилиши керак.
