1 декабрдан Ўзбекистонда қандай ўзгаришлар кучга киради?
Янги тартиблар зилзила хавфсизлиги, истеъмолчилар ҳуқуқлари, никоҳ жараёни ва экологик очиқликни ўз ичига олади.
1 декабрдан Ўзбекистонда сейсмик хавфсизликка оид ягона онлайн платформа ишга тушади. Унда эҳтимолий зилзилалар бўйича акселерограммалар, сейсмик районлаштириш хариталари, фаол тектоник узилмалар ва минтақавий таваккалчилик кўрсаткичлари жамланади. Ушбу ўзгаришлар зилзила хавфи юқори ҳудудларда лойиҳалаштириш сифатини оширишга хизмат қилади.
Шу санадан бошлаб истеъмолчиларнинг мурожаатларини кўриб чиқишнинг янги тартиби ҳам жорий этилади. Энди шикоятлар биринчи навбатда тадбиркор томонидан 10 кун ичида кўриб чиқилади, ҳал этилмаса Рақобат қўмитаси ёки ННТларга юборилади. Тадбиркорликни қўллаб-қувватлаш компанияси эса йирик лойиҳаларга кафиллик ҳажмини ошириб, гаров етишмаслиги бўйича қўллаб-қувватлаш механизмларини кучайтиради.
Никоҳни расмийлаштириш жараёнига ҳам ўзгартиш киритилиб, тиббий маълумотнома талаби бекор қилинади. Никоҳдан суд орқали ажрашганлар энди суд қарорини ФҲДЙга топшириши шарт эмас — маълумот алмашинуви тизим орқали автоматик амалга оширилади. Никоҳ шартномаларининг аслини талаб қилиш бекор қилиниб, электрон нусхалар «Нотариус» тизимига жойлаштирилади.
Экология ва рақамлаштириш йўналишида ҳам янгиликлар мавжуд. Атроф-муҳит мониторинги, кўчат экиш, парвариш бўйича маълумотлар очиқ тизимга жойлаштирилади. Шу билан бирга, туризм мутахассисларини қайта тайёрлайдиган халқаро академия Самарқандда иш бошлайди, нодавлат суд экспертлари мустақил фаолият юритиши мумкин бўлади, ҳуқуқий ҳужжатларни таҳлил қилувчи янги платформа эса тизимга жорий этилади.
