CITES CoP20 доирасида дарахт экиш акцияси ташкил этилди
Тадбирда 200 га яқин делегат иштирок этди, 1,5 гектар майдонга мингдан ортиқ кўчат экилди.
CITES CoP20 конференцияси доирасида ўтказилган экологик акцияда 200 га яқин делегатлар ҳамда халқаро ташкилотлар вакиллари иштирок этди. Тадбир давомида 1,5 гектар майдонда маҳаллий иқлим шароитига мос турли дарахт кўчатлари ўтқазилди. Бу ҳақда Zamon.uz мухбири хабар бермоқда.
Акция доирасида 60 та павлония, 100 та қарағай, 20 та чинар, 20 та қайрағоч, 20 та ясин, 30 та мевали дарахт ҳамда 750 та каталпа кўчати экилди. Ташкилотчилар бу ташаббус экологик барқарорликни мустаҳкамлашга хизмат қилишини таъкидлади.
Маълумотларга кўра, Ўзбекистонда халқаро тадбирлар давомида дарахт экиш анъанага айланган. Яқинда ЮНЕСКОнинг 80 йиллигига бағишлаб ташкил этилган “Яшел боғ” лойиҳаси доирасида ҳам кўплаб кўчатлар ўтқазилганди.
