Ўзбекистон-Хитой ҳамкорлигида “Самарқанд-2028” сунъий йўлдоши учирилади
У пахта ва дон экинлари вегетациясини мониторинг қилиш учун мўлжалланган махсус модель билан жиҳозланади.
Президент Шавкат Мирзиёевнинг ташаббуси билан космик технологиялар соҳасида янги лойиҳалар амалга оширилмоқда. Шу жумладан, “Самарқанд-2028” номли сунъий йўлдошни Хитой билан ҳамкорликда учириш режалаштирилган.
Рақамли технологиялар вазирининг биринчи ўринбосари Олег Пекоснинг “Ўзбекистон 24” телеканалига берган интервьюсида маълум қилишича, сунъий йўлдош 2026 йилда Хитой билан ҳамкорликда орбитага чиқарилади. У пахта ва дон экинлари вегетациясини мониторинг қилиш учун мўлжалланган махсус модель билан жиҳозланади. Бу технология орқали спектрал таҳлил 22 спектр асосида жойида амалга оширилади, шунингдек, сунъий интеллект модели тасвирларни тезкор қайта ишлаш ва аниқ натижаларни олиш имконини беради.
Мазкур сунъий йўлдош орқали олинган маълумотлар ҳаво сифатини бирламчи баҳолаш, қишлоқ хўжалиги экинлари ва ўрмонларни мониторинг қилиш, шунингдек, ер ресурсларини самарали бошқариш учун қўлланади.
Шунингдек, 24 ноябрь куни “Ўзкосмос” ва Хитойнинг STAR.VISION компанияси ўртасида стратегик меморандум имзоланган. Томонлар қўшма лойиҳаларни амалга ошириш, илмий ва технологик интеграцияни кучайтириш, университетлар ва компаниялар билан ҳамкорликни йўлга қўйишга келишиб олди. STAR.VISION ўзининг гиперспектрал сунъий йўлдошларидан бирига “Самарқанд-2028” номини беришга рози бўлди ва 2028 йилда Ўзбекистонда бўлиб ўтадиган Халқаро Астронавтика Конгрессини қўллаб-қувватлашини билдирди.
Мазкур ҳамкорлик миллий пахта ва буғдой хариталарини яратишда гиперспектрал маълумотлардан фойдаланишни ҳам қамраб олади.
