Қашқадарёда ота фарзандига 164 млн алимент тўлади
Шу тариқа ижро ҳужжати тамомланиб, барча чекловлар бекор қилинган.
Фуқаролик ишлари бўйича Шаҳрисабз туманларлараро судининг буйруғига асосан, қарздор А.Б. 2023 йилда туғилган фарзандининг моддий таъминоти учун ҳар ойлик даромадининг 1/4 қисми миқдорида алимент тўлаб бориши белгиланган эди.
Ижро ҳужжати Бюронинг Шаҳрисабз шаҳар бўлими иш юритувига келиб тушгач тегишли тартибда қарздорнинг мамлакат ҳудудидан чиқиш ҳуқуқлари вақтинча чекланди.
Ижро ҳаракатлари давомида қарздор фуқаро Бюро ходимларига хорижга чиқмоқчи эканлиги билдирди. Давлат ижрочиси томонидан берилган ҳуқуқий тушунтиришлар натижасида, қарздор А.Б. ундирувчи тараф билан келишган ҳолда алимент ва моддий таъминот учун жами 164 млн сўм маблағни бир йўла тўлаб берди.
Тўлов амалга оширилгандан сўнг жорий йилнинг 25 ноябрь ижро ҳужжати амалда тамомланиб, фуқаронинг хорижга чиқишига нисбатан қўйилган чеклов бекор қилинди.
