Сирдарёда 122 млн долларлик автомобиль ишлаб чиқариш лойиҳаси йўлга қўйилади

 

Сирдарё вилоятида саноат салоҳиятини ошириш, инвесторлар учун қулай шароитлар яратиш ва аҳоли бандлигини таъминлашга қаратилган йирик лойиҳалар босқичма-босқич амалга оширилмоқда.

 

Хусусан, келаси йилда Сирдарё туманида Хитойлик ҳамкорлар билан автомобиль ишлаб чиқариш бўйича 122 миллион долларлик қўшма лойиҳа ишга туширилади.

 

Шунингдек, яқинда туман ҳудудида Қозоғистон билан ҳамкорликда Марказий Осиё халқаро саноат кооперацияси маркази фаолияти йўлга қўйилди. Ушбу марказда:

 

300 миллион долларлик 14 та саноат корхонаси 2025 йилнинг биринчи чорагида иш бошлайди;

 

2026 йилда 720 миллион долларлик яна 40 та янги лойиҳа жойлаштирилиши режалаштирилган.

 

Аҳоли бандлигини ошириш борасидаги тизимли ислоҳотлар натижасида туманда қисқа вақт ичида сезиларли натижалар қайд этилди. Ўтган йили томорқа ердан оқилона фойдаланиш, кичик бизнес ва сервис хизматларини ривожлантириш бўйича янгича тизим айнан Сайхунобод туманида жорий этилган эди.

 

Натижада:

 

• 13 минг хонадонда томорқалардан фойдаланиш самарадорлиги бир неча баробарга ошди;
• 1 836 та хонадонда 5–6 сотихдан иборат, 622 та хонадонда 2–3 сотихли иссиқхоналар қурилди;
• Бир ярим йилда 700 та янги тадбиркор фаолиятини йўлга қўйди;
• 15 минг ишсиз фуқарога доимий даромад манбаи яратилди;
• 1,5 минг оила камбағалликдан чиқди.

 

Президент Шавкат Мирзиёев Сайхунободда кечаётган ўзгаришларни юқори баҳолаб, ҳудудда бунёдкорлик ва тадбиркорликни қўллаб-қувватлаш бўйича бошланган ишлар изчил давом эттирилишини таъкидлади.