Фарғонада Кадастр агентлиги бош инспектори пора билан ушланди
Шунингдек, давлат буюртмаси бўйича таъмирлашга рухсат бериш учун 5 500 доллар талаб қилган бош муҳандис қўлга олинди.
Давлат хавфсизлик хизмати Фарғона вилояти бўйича бошқармаси ва бошқа ҳуқуқ-тартибот органларининг ҳамкорлигида ўтказилган тезкор тадбирлар натижасида коррупцион хатти-ҳаракaтлар билан боғлиқ икки ҳолат аниқланиб, тегишли чоралар кўрилди.
Биринчи ҳолатда, Кадастр агентлигининг Фарғона вилояти Риштон тумани бўлими бош инспектори фуқаронинг яшаш ҳудудида қўшимча ер майдонини ўзбошимчалик билан эгаллагани ва қурилиш қилгани боис 84 миллион сўм миқдорида жарима қўлланилиши мумкинлигини билдирган. Шундан сўнг, у жарима қўлламаслик ва ер ҳужжатларини қонунийлаштириб бериш эвазига фуқародан 400 АҚШ доллари талаб қилган. Тезкор тадбир давомида бош инспектор талаб қилинган пул маблағини хизмат жойи биноси олдида олаётган вақтида ашёвий далиллар билан ушланди.
Иккинчи ҳолатда қурилиш фаолияти билан шуғулланувчи хусусий корхона 2025 йил октябрь ойида “Фарғона сув қурилиш инвест” давлат муассасасининг маъмурий биносини 850 миллион сўмлик мукаммал таъмирлаш бўйича танловда ғолиб бўлган. Бироқ мазкур муассасанинг бош муҳандиси ва бошқа масъуллар таъмирлаш ишларига рухсат бериш эвазига корхона раҳбаридан 5 500 АҚШ доллари талаб қилган. Тезкор тадбир чоғида улар 5 минг долларлик пул маблағини олаётган пайтида қўлга олинди.
Ҳозирда мазкур ҳолатлар юзасидан Жиноят кодексининг тегишли моддалари бўйича жиноят ишлари қўзғатилиб, тергов ҳаракатлари олиб борилмоқда.
