Тошкент туманида 1 млрд сўмлик валюта тўхтатиб қолинди
Улар “ташмачи” фуқаролар ёрдамида четга олиб чиқиб кетилаётган бўлган.
Давлат хавфсизлик хизмати Тошкент вилояти бўйича бошқармаси ҳамда божхона органлари томонидан ўтказилган тезкор тадбир натижасида хорижий валюта маблағларини “ташмачилар” орқали қўшни давлат ҳудудига ноқонуний равишда олиб чиқиб кетишга уринишнинг олди олинди.
Маълум бўлишича, гуруҳ етакчиси бўлган 1995-йилда туғилган фуқаро 5 млн 622 минг Россия рублини кичик қисмларга бўлиб, Қозоғистон Республикасига ўтказиб бериш учун ишончли шахсга топшираётган вақтида ашёвий далиллар билан қўлга олинган.
Тадбир давом эттирилиб, гумондорнинг автотранспорт воситаси ва яшаш манзилида ўтказилган кўрик натижасида қўшимча равишда 11 220 АҚШ доллари ҳамда пул маблағларининг ҳақиқий эгалари қайд этилган дафтари расмий тартибда ҳужжатлаштириб олинди.
Мазкур шахсга нисбатан Жиноят кодексининг 25, 182-моддаси 2-қисми “а” банди асосида жиноят иши қўзғатилиб, унга нисбатан “қамоқ” эҳтиёт чораси қўлланилган. Ҳозирда суриштирув-тергов ҳаракатлари олиб борилмоқда.
