Қозоғистонда туркий тилларга мослаштирилган энг йирик сунъий интеллект модели тақдим этилди
Мазкур модель қозоқ, турк, ўзбек, қирғиз, озарбайжон ва татар тилларига асосланган бўлиб, Марказий Осиёда шу миқёсда яратилган илк тўлиқ маҳаллий ASR ечим ҳисобланади.
Қозоғистоннинг Cybernet AI стартапи туркий тиллар учун мўлжалланган энг йирик автоматик нутқни аниқлаш (ASR) сунъий интеллект моделини ишлаб чиқди ва тақдим этди. Мазкур модель қозоқ, турк, ўзбек, қирғиз, озарбайжон ва татар тилларига асосланган бўлиб, Марказий Осиёда шу миқёсда яратилган илк тўлиқ маҳаллий ASR ечим ҳисобланади. Бу ҳақда Tengrinews нашри хабар берди.
Қозоғистон Республикаси Сунъий интеллект ва рақамли ривожланиш вазирлиги маълумотига кўра, ушбу лойиҳа инглиз тилидаги мавжуд моделларни мослаштириш асосида эмас, балки туркий тиллар гуруҳининг фонетик, грамматик ва лингвистик хусусиятларини тўлиқ ҳисобга олган ҳолда нолдан ишлаб чиқилган. Бу эса уни минтақа учун стратегик аҳамиятга эга инновацион маҳсулотга айлантиради.
Лойиҳа Astana Hub ҳамда Қозоғистон Республикаси Сунъий интеллект ва рақамли ривожланиш вазирлигининг стратегик кўмаги асосида, Misrosoft GPU инфратузилмасидан фойдаланган ҳолда амалга оширилган. Astana Hub бошқарувчи директори Танат Ускембаевнинг таъкидлашича, ушбу ишланма туркийзабон мамлакатларга сунъий интеллектга асосланган рақамли хизматларни сифатни пасайтирмаган ҳолда, ўз она тилларида ва мақбул нархларда жорий этиш имконини беради.
“Cybernet AI'нинг ривожланиши Қозоғистон учун глобал АI ечимлари истеъмолчиси мақомидан халқаро бозорда рақобатбардош технологиялар ишлаб чиқувчисига айланиш йўлида муҳим қадамдир”, — деди Ускембаев.
Cybernet AI техник директори Рашид Исмоиловнинг айтишича, компания атайлаб инглиз тилидаги моделларни мослаштиришдан воз кечиб, маҳаллий оғзаки нутқнинг жонли ва мураккаб шаклларини тушуна оладиган сунъий интеллект моделини яратишни мақсад қилган. Унинг фикрича, ушбу лойиҳа нафақат технологик маҳсулот, балки минтақавий сунъий интеллект экотизимини ривожлантириш ва Қозоғистоннинг технологик суверенитетини мустаҳкамлашга хизмат қилади.
