Ўзбекистонда асоссиз сабаблар билан судга келмаган мансабдорларга жарима жорий этилади

 

Олий Мажлис Қонунчилик палатаси матбуот хизматининг маълум қилишича, маъмурий суд ишларини юритишда дастлабки эшитув институти жорий этилмоқда. Ушбу босқичда далилларни тўплаш, даъволарни аниқлаштириш ва томонлар ўртасида келишувга эришиш имконияти яратилади. Бу эса ишларни кўриб чиқиш муддатлари ва ортиқча харажатларни камайтириши кутилмоқда.

 

Қонун лойиҳасида давлат амалдорларининг суд мажлисларида мажбурий иштироки белгилаб қўйилган. Асоссиз сабаблар билан судга келмаслик суд жаримасига сабаб бўлади. Ушбу чора суд жараёнларида интизомни кучайтириш ва ҳақиқий тортишув тамойилини таъминлашга қаратилган.

 

Шунингдек, маъмурий судларга судга ҳурматсизлик қилиш ҳамда хусусий ажрим ва қарорларни ижро этмаслик ҳолатларида маъмурий жазо чораларини қўллаш ваколати берилмоқда.

 

Қонун лойиҳасини ишлаб чиқишда Германия, Япония, Эстония ва Франция каби ривожланган давлатларнинг маъмурий адлия соҳасидаги илғор тажрибаси чуқур ўрганилган, шунингдек, коррупцияга қарши ва гендер экспертизаларидан ўтказилган ҳамда жамоатчилик муҳокамасида қўллаб-қувватланган.

 

Таъкидланишича, мазкур ўзгаришлар давлат органлари устидан суд назоратини кучайтириш, бизнес муҳитини яхшилаш ва суд тизимига бўлган жамоатчилик ишончини мустаҳкамлашга хизмат қилади.

 

Қонун лойиҳаси биринчи ўқишда қабул қилинди.