Тошкент—Чорвоқ йўлида тезлик 80 км/соатгача пасайтирилади
2025 йилда мазкур йўналишда 63 та ЙТҲ қайд этилган.
Тошкент—Чорвоқ автомобиль йўлининг айрим қисмларида ҳаракат тезлиги 80 км/соатгача чекланади. Бу ҳақда халқ депутатлари Тошкент вилояти Кенгашининг тегишли қарори қабул қилинди.
Қарорга кўра, давлат аҳамиятига эга Бектемир—Чирчиқ—Ғазалкент—Чорвоқ (4R-12) автомобиль йўлининг аҳоли пунктларидан ташқарида жойлашган 6 та қисмида рухсат этилган энг юқори тезлик 100 км/соатдан 80 км/соатгача пасайтирилди.
Ҳужжатда таъкидланишича, ушбу чора-тадбирлар мазкур йўналишда кузатилаётган юқори авариявийлик даражаси билан боғлиқ. Хусусан, 2025 йилда йўлнинг 19-километридан 74-километригача бўлган қисмида тезлик режимига риоя қилмаслик оқибатида 63 та йўл-транспорт ҳодисаси қайд этилган.
Мазкур ЙТҲлар оқибатида 15 нафар фуқаро ҳалок бўлган, 50 нафар шахс турли даражадаги тан жароҳатлари олган.
Қабул қилинган қарор йўл ҳаракати хавфсизлигини ошириш ҳамда бахтсиз ҳодисалар сонини камайтиришга қаратилган.
