Украинада 14 ёшдан никоҳга рухсат берилиши мумкин
Мамлакатда никоҳ ёши 18 ёш бўлиб қолади, аммо айрим ҳолатларда 14 ёш учун истисно жорий этиш таклиф қилинмоқда.
Украина Олий Радасида никоҳ ёшига оид ўзгаришларни назарда тутувчи янги қонун лойиҳаси рўйхатга олинди. Ҳужжатга кўра, айрим истисно ҳолатларда — хусусан, ҳомиладорлик ёки бола туғилиши юз берса — 14 ёшдан бошлаб никоҳга рухсат бериш таклиф қилинмоқда. Бу ҳақда ТАСС хабар берди.
Маълумотларга кўра, мазкур ташаббус Фуқаролик кодексининг янги лойиҳаси доирасида ишлаб чиқилган бўлиб, унда “Никоҳ ҳуқуқи” моддасига тегишли ўзгартиришлар киритилиши кўзда тутилган. Қонун лойиҳаси Олий Рада спикери Руслан Стефанчук томонидан илгари сурилган ташаббуслар қаторига киради.
Таклиф этилаётган нормаларга кўра, 14 ёшдаги шахслар учун никоҳ фақат суд қарори асосида ва фақат ҳомиладорлик ёки бола туғилиши каби истисно ҳолатларда рухсат этилиши мумкин. Шу билан бирга, 16 ёшдан бошлаб никоҳга рухсат бериш амалиёти суд қарори орқали сақлаб қолиш режалаштирилмоқда.
Амалдаги Украина қонунчилигида эса эркаклар ва аёллар учун никоҳнинг умумий минимал ёши 18 ёш этиб белгиланган. Қонун лойиҳаси ҳозирча ташаббус босқичида бўлиб, у парламент қўмиталари муҳокамаси ва овоз бериш жараёнларидан ўтиши керак.
Мутахассислар ва жамоатчилик орасида мазкур ташаббус юзасидан турли фикрлар билдирилмоқда: айримлар буни ижтимоий ҳимоя механизми сифатида кўрса, бошқалар эса эрта никоҳлар хавфи ортиши мумкинлигини таъкидламоқда.
