Ўзбекистонда 2025 йилда 12 мингдан ортиқ фуқаро фирибгарликда айбланиб судланган
Айбдорларга жарима, мажбурий ишлар, чеклаш ва озодликдан маҳрум қилиш жазолари тайинланган.
Ўзбекистонда фирибгарлик жинояти бўйича судланган шахслар сони маълум қилинди. Олий суд матбуот хизмати берган маълумотга кўра, 2025 йил давомида мамлакатда Жиноят кодексининг 168-моддаси (фирибгарлик) билан боғлиқ жиноятлар бўйича 12 мингдан ортиқ фуқаро жиноий жавобгарликка тортилган.
Келтирилишича, мазкур модда доирасида жами 12 749 нафар шахсга нисбатан турли жазо чоралар қўлланилган. Жумладан, айбланувчиларга жарима, муайян ҳуқуқлардан маҳрум қилиш, ахлоқ тузатиш ишлари, мажбурий жамоат ишлари, озодликни чеклаш ҳамда озодликдан маҳрум қилиш каби жазолар тайинланган. Шунингдек, ҳисоботда 137 нафар шахсга нисбатан шартли жазо қўллангани қайд этилган.
Статистик маълумотларга кўра, фирибгарлик билан боғлиқ жиноят ишлари энг кўп Тошкент шаҳри, Фарғона, Самарқанд, Наманган ва Тошкент вилоятларида кўриб чиқилган.
