Мубашшир Аҳмад соғлиги туфайли Тошкентдаги «Сангород» га кўчирилди

 

Жамоатчиликка Мубашшир Аҳмад тахаллуси билан таниш бўлган Алишер Турсунов Навоий вилоятининг Қизилтепа туманидаги 5-сонли жазони ижро этиш колониясидан Тошкент шаҳридаги «Сангород» номи билан машҳур ихтисослаштирилган тиббий колонияга кўчирилди.

 

Маълум қилинишича, бу қарор маҳкумнинг соғлиғини чуқур тиббий кўрик ва даволаш мақсадида амалга оширилган. Хабарларга кўра, Алишер Турсунов оғир диабет касаллигидан азият чекади. Ушбу ҳолат Ички ишлар вазирлиги ва Соғлиқни сақлаш вазирлиги томонидан тасдиқланган бўлиб, кейинги қамоқ жазосини давом эттиришга тўсқинлик қилиши мумкин бўлган касалликлар рўйхатига киритилган.

 

Ҳуқуқ ҳимоячилари Ахлоқ тузатиш департаменти инсонпарварлик тамойилларига асосланиб, судга унинг жазосининг қолган қисмини енгилроқ жазо билан алмаштириш тўғрисида илтимоснома киритиш имкониятига умид билдиришган.

 

Мубашшир Аҳмад жамоат олдида ўз чиқишларида Ўзбекистоннинг ички ва ташқи сиёсатини қўллаб-қувватлашга оид фаолияти билан танилган. У Тошкент шаҳар Учтепа туман суди ҳукми билан 2,5 йилга озодликдан маҳрум қилинган.

 

Эслатиб ўтамиз, 2026 йил январ ойида Омбудсман вакили Навоий вилоятидаги 5-сонли колонияда унинг сақланиш шароитларини текширган эди.