Шароф Рашидов тумани собиқ ҳокими 11 йилга қамалди

 

Жиноят ишлари бўйича Зомин туман суди томонидан эълон қилинган ҳукмга мувофиқ, Шароф Рашидов тумани ҳокими лавозимида фаолият юритган M.X. Ўзбекистон Республикаси Жиноят кодексининг 167-моддаси 2-қисми «б», «в», «г» бандлари (ўзлаштириш ёки растрата йўли билан талон-торож қилиш), 206-моддаси 1-қисми (ҳокимият ёки мансаб ваколати доирасидан четга чиқиш), 210-моддаси 3-қисми «а» банди (пора олиш) ҳамда 229-4-моддаси 2-қисми «а» бандида (ер бериш тартибини бузиш) назарда тутилган жиноятларни содир этганликда айбдор деб топилди. Бу ҳақда Олий суд матбуот хизмати хабар берди.

 

Шунингдек, Шароф Рашидов тумани ҳокимлигининг қурилиш, коммуникациялар, коммунал хўжалик, экология ва кўкаламзорлаштириш масалалари бўйича бош мутахассиси лавозимида ишлаган Н.И. Ўзбекистон Республикаси Жиноят кодексининг 28, 210-моддаси 3-қисми «а» бандида назарда тутилган жиноятни содир этганликда айбдор деб топилди.

 

Суд ҳукмига кўра, M.X. га 3 йил муддатга ҳокимият ва давлат бошқаруви органларида мансабдорлик ҳамда моддий жавобгар лавозимларда ишлаш ҳуқуқидан маҳрум қилган ҳолда базавий ҳисоблаш миқдорининг 150 баравари миқдорида жарима жазоси ҳамда 11 йил муддатга озодликдан маҳрум қилиш жазоси тайинланди.

 

Н.И. га эса 2 йил муддатга ҳокимият ва давлат бошқаруви органларида мансабдорлик ҳамда моддий жавобгар лавозимларда ишлаш ҳуқуқидан маҳрум қилган ҳолда 7 йил муддатга озодликдан маҳрум қилиш жазоси белгиланди.

 

Судланувчилар тайинланган озодликдан маҳрум қилиш жазоларини умумий тартибли жазони ижро этиш колонияларида ўташи белгиланди.

 

Шу билан бирга, биринчи инстанция суди ҳукми устидан тарафлар қонунчиликда белгиланган тартиб ва муддатларда Жиззах вилоят судининг жиноят ишлари бўйича судлов ҳайъатига апелляция ёки кассация тартибида шикоят бериш ҳамда протест келтириш ҳуқуқига эга экани маълум қилинди.