Андижонда юк машинаси уриб юбориши оқибатида 8 ёшли бола вафот этди
Юк машинаси ҳаракатланиб кетаётган вақтда бола пиёдалар ўтиш жойидан югуриб чиққан.
Жорий йилнинг 24 февраль куни соат 15:56 ларда Андижон вилояти Балиқчи тумани “Эски Марказ” МФЙ ҳудудидан ўтган Д-105 автомобиль йўлининг “Фарғона ҳалқа йўли” 103-километрида йўл-транспорт ҳодисаси содир бўлди. Бу ҳақда Андижон вилояти ЙҲХБ матбуот хизмати хабар берди.
Дастлабки маълумотларга кўра, 2002 йилда туғилган А.Ж. бошқарувидаги «ЗИЛ-130» русумли юк транспорт воситаси тартибга солинган чорраҳада ҳаракатланиб келаётган вақтда пиёдалар ўтиш жойидан югуриб чиққан 2017 йилда туғилган Ҳ.М. ни уриб юборган. Шундан сўнг ҳайдовчи руль бошқарувини йўқотиб, чорраҳада тўхтаб турган «Соbalt» русумли транспорт воситаси билан тўқнашган.
Ҳодиса оқибатида вояга етмаган пиёда Ҳ.М. олган тан жароҳатлари билан шифохонага етказилган. Кўрсатилган тиббий муолажаларга қарамасдан, у вафот этган.
Мазкур ҳолат юзасидан Балиқчи тумани ИИБ ҳузуридаги Тергов бўлинмаси томонидан Ўзбекистон Республикаси Жиноят кодексининг 266-моддаси 2-қисми билан жиноят иши қўзғатилиб тергов ҳаракатлари олиб борилмоқда.
