Кимдир 15 суткага киради, лекин биз кичик жарима билан қутулдик — мақтанчоқ йигит узр сўради
Аввалроқ BMW'да йўл қоидаларини бузган йигит PR мақсадида олинган видеолари билан фахрланишини билдирган эди.
Аввалроқ ижтимоий тармоқларда тарқалган ЙПХ ходимларининг тўхташ ишорасига бўйсунмасдан ҳаракатлангани, ходим эса палкасини отгани тасвирланган видео тарқалган эди. Куни кеча тармоқларда ушбу қоидабузар ҳайдовчининг янги видеоси пайдо бўлиб, унда йигит ўз қилган ишидан фахрланишини билдирган.
Видеоларда йигит “Кимдир 15 суткага киради, лекин биз кичик жарима билан қутилдик” деб айтгани кўрсатилган.
Бош прокуратура томонидан Узбелас Перформансе автоулов сервиси раҳбари Асадбек Жумаев иштирокидаги видеоинтервю ўрганилди.
Йигитнинг таъкидлашича, у транспорт воситаларини тунинг қилиш ва хизмат кўрсатиш билан шуғулланган, ЙПХ ходимига зарар етказмаган. Ижтимоий тармоқларда тарқалган видеолар PR мақсадида ва мақтанчоқликдан келиб чиққан бўлиб, йигит ўз хатти-ҳаракатлари нотўғри эканини тан олиб, барча жабрланганлардан узр сўраган.
Аниқланишича, 2026 йил 16 январдаги Тошкент шаҳар Мирзо Улуғбек туман судининг қарорига асосан, А.Жумаев Маъмурий жавобгарлик тўғрисидаги кодекснинг 195-2-моддаси (ҳуқуқни муҳофаза қилувчи орган ходимларининг фото ва видеотасвирларини уларнинг обрўсини туширадиган тарзда тарқатиш) билан базавий ҳисоблаш миқдорининг 20 баравари, яъни 8,4 млн сўм жаримага тортилган.
Ҳолатга ҳолис ҳуқуқий баҳо бериш мақсадида, 2026 йил 26 февраль куни Мирзо Улуғбек туман прокуратураси Тошкент шаҳар судининг жиноят ишлари бўйича судлов ҳайъатиига протест киритилди.
